ҚР БжҒ министрлігі Ғылым Комитетінің Р.Б. Сүлейменов атындағы Шығыстану институтының директоры, ф.ғ.д., профессор Ә. Дербісәлі 2016 жылдың 20 қаңтарында  «Ғылым Комитетінің» төрағасы С.Е. Жолдасбаевтың «Ғылым комитетінің қарамағындағы ұйымдар басшыларының жұмысы нәтижелерін жылсайын тыңдау туралы» бұйрығына сәйкес 2015 жылы атқарылған іс-шаралар жөнінде ұжым алдында есеп берді.

Ұжым басшысы институттың мынадай жетістіктері мен мәселелеріне тоқталды:

1.    Институтта бір жыл ішінде атқарылған іс-шаралар

2.    Ғылыми жобалардың орындалуы

3.    Институттың халықаралық байланыстары

4.    Институт ғалымдарының жетістіктері мен марапаттары

5.    Институт қызметкерлерінің жарияланымдары

6.    Р.Б. Сүлейменов атындағы Шығыстану институты мен әл-Фараби атындағы ҚазҰУ арасындағы білім мен ғылымның интеграциясы және докторанттар мен магистранттар мәселесі

 

2015 жылы Институтта мынадай  ірі іс-шаралар өткізілді:

Халықаралық конференция-2, Республикалық конференция-1, Дөңгелек үстел -3, кітап тұсаукесері-2, Жазғы мектеп -1, ресми кездесу -12.

ҚР БҒМ Ғылым Комитетінің Р.Б. Сүлейменов атындағы Шығыстану институты 2015-2017 жылдарға арналған ҚР БҒМ ғылыми зерттеулерді гранттық қаржыландыру шеңберіндегі 2015 жылы 12 жоба және «Халық тарих толқынында» мақсатты ғылыми бағдарламасы шеңберінде үш жоба, ҚР БҒМ ҒК Философия, саясаттану және дінтану институтымен бірлестікте екі жоба бойынша ғылыми зерттеулер жүргізді. «Халық тарих толқынында» мақсатты бағдарламасы жобаларының жүзеге асуы 2014-2016 жылдарды қамтиды. 2015 жылы 2013-2015 жылдарға арналған ҚР БҒМ ғылыми зерттеулерді гранттық қаржыландыру шеңберіндегі 1 жоба аяқталды. 2015 ж. жоспарланған жұмыстар толықтай орындалды.

Р.Б. Сүлейменов атындағы Шығыстану институты 2015 жылы әлемнің сараптамалық орталықтарын дамыту жөніндегі Пенсильвани университетінің (АҚШ) «Сараптамалық орталықтар және азаматтық қоғам» бағдарламасына қатысушылардың дайындаған Баяндамасына сәйкес, Орталық Азиядағы жетекші сараптама орталығының қатарында аталып, әлем бойынша 40-шы орынды иемденді.

2015 жылы отандық ғылымға қосқан қомақты үлесі үшін институттың бас ғылыми қызметкері, т.ғ.д., доцент З.Г.Жалилов «Құрмет» орденімен, т.ғ.д., профессор М.Әбусейітова «Қазақстан халқы Ассамблеясына 20 жыл» медалімен, жетекші ғылыми қызметкерлер ф.ғ.к. Н.Базылхан мен т.ғ.д. Ә.Момынов «Қазақстан Республикасының ғылымын дамытуға сіңірген еңбегі үшін» төсбелгісімен марапатталды.

Зерттеу нәтижелерін Институт қызметкерлері халықаралық және республикалық конференциялардың 105-інде сөз сөйлеп, апробациялады.

Институт қызметкерлері 2015 ж. 181 ғылыми еңбек, оның ішінде –7 монография, 4 кітап, 7 оқулық пен оқу құралы, 164 ғылыми мақала жариялады .

2015 ж. институт қызметкерлері  әртүрлі дәрежедегі 121 халықаралық және республикалық конференцияларға қатысып, баяндама жасады. Импакт факторлы журналдарда бір жыл ішінде 4 мақала жарияланды. 106 мақала мен интервью бұқаралық ақпарат құралдарында жария болды («Егемен Қазақстан», «Казахстанская правда», «Уйгур авази», «Азия сегодня», «Қазақ радиосы», «Хабар», «Қазақстан»телеарналары және т.б.).

Институт директоры, ф.ғ.д., профессор Әбсаттар қажы Дербісәлі «Руханият және мәдениет» атты кітабын шығарып («Атамұра» баспасы, Алматы, 2016,711 бет), бір жылда 20-дан аса ғылыми мақала жариялап, 30-дан аса халықаралық және республикалық конференцияларға қатысып, баяндама жасады.

Кең көлемді баяндамадан кейін жиын соңында сұрақтар қойылып, оған институт директоры жауап берді. Институт директоры Ә.Дербісәлінің есебін ұжым мүшелері бірауыздан мақұлдады.Бұл жиынға ұжым мүшелерімен қатар, басқа институттардың қызметкерлері де қатысты.